George Fransman – Sy hart klop vir Abbotsdale Rugbyklub
Op 67-jarige ouderdom het Oom George Fransman ’n lekker klomp rugbyherinneringe om te deel. Oorspronklik van Elsiesrivier, vertel hy laggend hoe hy uiteindelik in Abbotsdale beland het – alles te danke aan sy liefste vroutjie!
Sport was nog altyd deel van Oom George se lewe. Min mense sal seker glo dat hy eintlik eers sokker gespeel het, voordat rugby sy hart gesteel het. Dit was in 1982 dat die rugbygogga hom behoorlik gebyt het toe hy vir Abbotsdale RFC begin speel het.
Maar Oom George was nie iemand wat hom tot net een sport beperk het nie! Hy het op ’n Saterdag vir Abbotsdale RFC rugby gespeel en dan Sondae met die bus Kaap toe gereis om sy sokkerwedstryde te gaan speel. Ná die wedstryde het hy sommer weer die aand met die Male-trein terug huis toe gekom. Praat van ’n man met ’n passie vir sport!
Op die rugbyveld het Oom George sy merk gemaak as ’n goeie vleuel en heelagter. Hy was ook deel van die groep wat destyds aan die Rapport-toernooi in Stellenbosch deelgeneem het, waar hulle teen spanne soos Riverstones, Violets en Polisie kragte gemeet het.
Met ’n goeie skopvoet in sy arsenaal het Oom George ook sy oomblikke van glorie beleef. Hy vertel trots hoe hy met ’n skepskop vir Worcester kon sink en ’n belangrike oorwinning vir sy span help verseker het. Hy het boonop die veld gedeel met plaaslike rugby-legendes soos Roland Philips en Attie Lategan. Dit is tye wat ’n mens nie sommer kan vergeet nie!
Wanneer Oom George praat oor wat Abbotsdale Rugbyklub so spesiaal maak, is dit duidelik dat dit vir hom oor veel meer as net rugby gaan. Volgens hom lê die klub se krag daarin dat Abbotsdale dalk ’n klein plekkie is, maar dat die manne altyd bymekaar staan en die gemeenskap die klub en sy spelers getrou ondersteun.
Hy lag en sê ’n mens kan party Saterdae by ’n hele paar huise aanklop en niemand daar kry nie, want almal is by die rugbyveld! Dit wys net hoe diep rugby in die gemeenskap se hart lê.
Oom George se liefde vir die klub het ook nie opgehou toe sy speelloopbaan tot ’n einde gekom het nie. Hy het later as spanbestuurder van die eerste span gedien en daarna ook die derde span afgerig. Hy het selfs vir twee termyne as klubvoorsitter gedien en ’n belangrike rol gespeel in die bestuur van die klub.
Wanneer daar oor datums gepraat word, lag hy en erken dat hy nie meer alles presies kan onthou nie. Maar een ding is duidelik: die herinneringe, die mense en die liefde vir Abbotsdale Rugbyklub lê steeds diep in sy hart.
Oom George se storie is ’n mooi getuienis dat ’n rugbyklub nie net uit spelers en wedstryde bestaan nie, maar uit mense wat oor baie jare hul tyd, energie en liefde gee om die klub aan die gang te hou.
Dankie, Oom George, vir jou bydrae tot Abbotsdale Rugbyklub! Jou storie is deel van die klub se geskiedenis, en jou liefde vir die groen-en-geel familie is iets om op trots te wees.
Een klub, een gemeenskap, ’n leeftyd se herinneringe!
Storie deur Cereline Hector (Abbotsdale Rugby Media)
