Town en Saffies pak mekaar in Sanlam Boland Top12

Deur Davie Lawrence | Foto: Sydney Armoed

Rugby uit die boonste rakke was aan die orde van die dag Saterdag, 25 November in die Sanlam Boland Top12 semi-finale op n vol gepakte Boland Stadion in Wellington.

In ons eerste semi-finaal het Safcol United van Grabouw behoorlik sy stem dik gemaak en die vloer gevee met Darling. Dit het behoorlik drieë gereën en die Swartlanders kon nie al die gate toe stop nie. Hierdie wedstryd het geëindig 68-38 in die Overbergers se guns. Hiermeer het Safcol nou n duidelike boodskap gestuur, dat hulle baie ernstig is oor hul voornemens om as die algehele kampioen gekroon te word.

Daar was heelwat drama tot aan einde in die tweede semi-finaal, toe Robertson met 32-29 aan die wenkant was teen Wesbank in baie spanningsvolle wedstryd. Dit het in die eerste helfte gelyk asof Robertson met die wedstryd gaan weghardloop na hulle met die draaislag 25-8 voor was.

Wesbank het egter nie gaan lê nie en het met n goeie terugveg poging in die tweede helfte verseker dat hierdie wedstryd eers in die finale sekondes beslis sou word . Daardie laaste paar minute het toeskouers op die punte van hulle stoele gehad met Wesbank wat verwoed aangeval het. Robertson het egter kalm gebly en seker gemaak hulle speel volgende week in die finaal teen Safcol.

Die Sanlam Boland Top12 finaal asook die Gemeenskapskild, Streeksuitdaag, en Vroue finale word almal regstreeks op die SuperSport Schools App uitgesaai. Alle wedstryde vind op die Boland Rugby Stadion plaas. Afskop tye sal later in die week bekend gemaak word. Hou gedurig die Boland Rugby Unie se Facebook blad dop.