‘Ons het ‘n plan om kookwater Mahoney te stuit’ – Neil Papier

Foto: Lizette Smit

Kyk jy na die puntelyste in die Sanlam Boland Top12-reeks, sal Safcol as die oorweldigende gunsteling beskou word vir Saterdag se halfeindtryd teen Darling in die Boland-stadion in Wellington.

Neil Papier, afrigter van Darling, skets egter ’n ander prentjie vir diegene wat sy span durf afskryf.

“Niemand gee ons ’n kans in die [Sanlam Boland] Top12 nie. Dit was maar dieselfde in die Liga gewees. Ons was altyd die buiteperd en mense het ons afgeskryf. Ons put definitief motivering daaruit,” sê hy.

Papier meen verder dat al die druk op Safcol is. Saffies het al vyf hul ligawedstryde gewen, terwyl Darling die halfeindronde gemaak het met drie wenne en twee nederlae.

“Ek dink Safcol voel die druk. Hulle het hul vriendskaplike wedstryde, die liga en Paastoernooi gewen. Hulle soek hierdie beker, sê hulle. Hulle gaan die druk beslis voel. Tagtig persent van my spelers weet hoe om in (die Boland-stadion) in Wellington te speel, waar Safcol as ’n span nog nie daar was nie.”

Darling se karakter het in die Sanlam Boland Top12 se ligafase sterk deurgekom met ’n weg-oorwinning van 41-38 oor Saldanha Bay nadat hulle ’n week vantevore op hul tuisveld met 37-40 teen Hawston verloor het. Papier se troepe moes ook op hul tuisveld met 24-30 die knie voor Robertson buig, maar die wenne oor Saldanha Bay, Roses United, en die Eagles span in Vanrhynsdorp was genoeg om hulle in die halfeindronde te kry.

Papier sê dat hulle ’n plan het om Saffies se briljante heelagter, Connor Mahoney, in toom te hou.

“Ek sê altyd moet hom geen balbesit gee nie. As ons skop, moet dit contestable wees. As jy swak skop, moet jy goeie opvolglyne hê om hom te stop. Of jy skop glad nie. Hou die bal net en sorg dat hy uitsluitlik verdedig,” sê hy.

@bolandrugbyunion

CONOR MAHONEY, jou doring! Die man trap seker af in die appelboorde. Die week se @tekkie_town play of the day in die @saffiesrugby teen @young_hamiltons_rfc @sanlam_group Boland Top12 wedstryd. #sbt12 #sbt12santamproper #sbt12tekkietown #sbt12vuma #sbt12vironsplek

♬ Dramatic Military – Faid rafanda

“Ons het oor Mahoney gesels, dat ons dink hy een van Safcol se sterk punte is. Hy gee hulle momentum en verskaf die x-faktor in hul span.”

Papier meen dat Safcol se vermoë om die situasie met briljante individue te speel, hulle gevaarlik maak.

Hy is egter stilletjies vol vertroue dat die pyle in Darling se koker genoeg sal wees.

“Hulle gaan ons beslis in die vaste fasette moet keer. Ons skrum en dryf goed. As hulle ons nie daar kan keer nie, gaan dit ’n moeilike Darling-span in hul gesigte wees!,” sê Papier.

“Safcol is ’n briljante span met puik individue, maar ons het die ervaring. As ons speel soos ons moet, met ons spelpatroon en strukture, dink ek ons sal die knoop deurhak.”